ട്രോളിംഗ് നിരോധനം പ്രാബല്യത്തില്‍ വരുന്നതോടെ അനുബന്ധ മേഖലകളും നിശ്ചലമാകും. ഹാര്‍ബര്‍ കേന്ദ്രീകരിച്ച് മത്സ്യക്കച്ചവടം നടത്തുന്ന ഏജന്‍സികള്‍, സംസ്‌കരണ ശാലകള്‍, പീലിംഗ് ഷെഡ്ഡുകള്‍, മത്സ്യം തിരിയുന്ന ഷെഡ്ഡുകള്‍, ഐസ് പൊടിച്ചു വില്‍ക്കുന്ന ക്രഷറുകള്‍, ഹാര്‍ബറുകളോടനുബന്ധിച്ചു പ്രവര്‍ത്തിക്കുന്ന ഭക്ഷണശാലകള്‍, മത്സ്യം കയറ്റി അന്യ സംസ്ഥാനങ്ങളിലേക്കും പ്രാദേശിക മാര്‍ക്കറ്റുകളിലേക്കും പോകുന്ന വാഹനങ്ങള്‍, മറ്റ് അനുബന്ധ വ്യാപാര മേഖലകള്‍ തുടങ്ങി ഈ മേഖല പൂര്‍ണമായും നിശ്ചലമാകും. ബോട്ടുകളുടെ അറ്റകുറ്റപ്പണികളും പെയിന്റിംഗുമെല്ലാം ട്രോളിംഗ് നിരോധന സമയത്താണ് തീര്‍ക്കുക. ഈ പ്രദേശങ്ങളില്‍ പണിയെടുക്കുന്ന തമിഴ്‌നാട്ടിലെ കുളച്ചല്‍ സ്വദേശികള്‍ നാട്ടിലേക്ക് പോകും.
അതേസമയം ഈ കാലയളവിലും എന്‍ജിന്‍ ഘടിപ്പിച്ച പരമ്പരാഗത വള്ളങ്ങള്‍ മത്സ്യബന്ധനത്തിനു പോകും. കുറെയേറെ ബോട്ട് തൊഴിലാളികളും ഇക്കാലയളവില്‍ ഇവരോടൊപ്പം പോകാറുണ്ട്. വള്ളക്കാര്‍ക്ക് ഈ കാലയളവില്‍ സാമാന്യം നല്ല തോതില്‍ മത്സ്യം ലഭിക്കാറുള്ളതാണ്. മഴ മാറി വെയില്‍ കണ്ടാല്‍ നല്ല മത്സ്യ ലഭ്യതയുണ്ടാകുമെന്നാണ് അനുഭവം. നാരന്‍, പൂവാലന്‍, കരിക്കാടി എന്നീ ചെമ്മീനുകളുടേയും ആവോലി, കുടുത, മാച്ചാന്‍, അയല തുടങ്ങിയ മീനുകളുടേയും ചാകരക്കൂട്ടങ്ങള്‍ തീരത്തേക്ക് വരും. മുന്‍കാലങ്ങളില്‍ ഇവര്‍ ഉപരിതലത്തിലെത്തുന്ന മത്സ്യങ്ങളെയാണ് പിടിച്ചെടുത്തിരുന്നത്. എന്നാല്‍ ശക്തമായ എന്‍ജിനുകള്‍ ഘടിപ്പിച്ചിട്ടുള്ളതിനാല്‍ മധ്യഭാഗത്തുള്ള മത്സ്യങ്ങളെക്കൂടി കിട്ടും.
നിരോധനം ലംഘിച്ച് ബോട്ടുകള്‍ കടലില്‍ ഇറങ്ങുന്നത് തടയാന്‍ കടലിലും കരയിലും ആവശ്യമായ സന്നാഹങ്ങള്‍ അധികൃതര്‍ ഒരുക്കിയിട്ടുണ്ട്. മുന്‍കാലങ്ങളിലേത് പോലെ നിരോധനം ലംഘിച്ച് ഇപ്പോള്‍ മത്സ്യബന്ധനം നടത്താത്തതിനാല്‍ മേഖലയില്‍ സംഘര്‍ഷം ഉണ്ടാകാറില്ല.
No comments:
Post a Comment