കോടതിവിധി അനുകൂലമാണെങ്കില്‍ ജഡ്ജിക്ക് സിന്ദാബാദ് വിളിക്കുകയും എതിരാകുമ്പോള്‍ ചീത്ത വിളിക്കുകയും ചെയ്യുന്നതല്ല സര്‍ക്കാരിന്റെ നയം. മൂന്നാര്‍ കയ്യേറ്റം സംബന്ധിച്ച ഹൈക്കോടതി വിധി പഠിച്ചശേഷം സര്‍ക്കാര്‍ വേണ്ട നടപടികള്‍ കൈക്കൊള്ളും. കോടതിയോട് സര്‍ക്കാരിന് അങ്ങേയറ്റം ബഹുമാനമാണുള്ളത്. വിധിന്യായം പഠിച്ചശേഷം വേണ്ട നടപടി കൈക്കൊണ്ട് മുന്നോട്ടുപോകും. മൂന്നാര്‍ ഓപ്പറേഷനില്‍ തെറ്റു പറ്റിയിട്ടുണ്ടെങ്കില്‍ അത് തിരുത്തും. അപ്പീല്‍ പോവുകയാണ് വേണ്ടതെങ്കില്‍ അങ്ങനെ ചെയ്യും. എന്തു തന്നെയായാലും സംസ്ഥാനത്തിന്റെ താല്‍പര്യങ്ങള്‍ സംരക്ഷിക്കുന്ന നടപടി മാത്രമേ സര്‍ക്കാര്‍ കൈക്കൊള്ളുകയുള്ളൂ-മുഖ്യമന്ത്രി പറഞ്ഞു.
പ്‌ളസ് ടു അധിക ബാച്ച് അനുവദിച്ചതുമായി ബന്ധപ്പെട്ട വിഷയത്തില്‍ അഴിമതിയൊന്നും നടന്നിട്ടില്ലെന്നും മുഖ്യമന്ത്രി പറഞ്ഞു. തെറ്റിദ്ധാരണമൂലമാണ് എം.ഇ.എസ്. പ്രസിഡന്റ് ഫസല്‍ ഗഫൂര്‍ ഇതു സംബന്ധിച്ച് ആരോപണം ഉന്നയിച്ചത് എന്നാണ് കരുതുന്നത്. എന്നാല്‍, ഈ ആരോപണങ്ങളൊന്നും ഫസല്‍ ഗഫൂര്‍ എന്നോടു പറഞ്ഞിട്ടില്ല. വേറെ ആരോടെങ്കിലും പറഞ്ഞിട്ടുണ്ടെങ്കില്‍ അതിനെ ഗൗരവമായി കാണുകയും വേണ്ട നടപടി കൈക്കൊള്ളുകയും ചെയ്യും-മുഖ്യമന്ത്രി പറഞ്ഞു.
സമ്പൂര്‍ണ വൈദ്യുതീകരണ പ്രഖ്യാപനം നടത്താനും ഖാദി റംസാന്‍-ഓണം മേളയുടെ ഉദ്ഘാടനം നിര്‍വഹിക്കാനുമാണ് മുഖ്യമന്ത്രി കോഴിക്കോട്ടെത്തിയത്.
No comments:
Post a Comment